LAOAG CITY – Napan binisita dagiti kakapitan iti ili ti San Nicolas ni Mayor Mike Hernando apaman a simmangpet manipod iti panagbakasyon na idiay isla ti Hawaii.
Kuna ti mayor a ti kangrunaan a gagem dagiti kakapitan iti panagbisita da kenkuana ket napanda kinumusta ti bakasyon na iti ballasiw taaw.
Malaksid iti daytoy, inammo pay dagiti kakapitan ti plano ni Mayor Hernando para iti panag-fiesta da intono disyembre.
Kabayatanna, inpakaammo ni Mayor Hernando nga addan ti uppat a balikbayan a nangikari nga agawid intono disyembre tapno agatendar iti Balikbayan Nights.
Mangnamnama ti mayor nga ad-ado pay dagiti balikbayan nga agawid intono disyembre tapno makipaset iti panagfiesta da kangrunaan na ti Balikbayan Nights iti ili ti San Nicolas.
Kabayatanna, nangipaay met ti komento ti ni Mayor Hernando mainaig iti immunan a panangkumpirmar ti dati a TV host a ni Paolo Barba Bediones nga agpaidasig a para mayor iti ili ti San Nicolas.
Kuna na a nawaya ti siasinno man a mayat nga agkandidato, ngem nagkedked paylaeng daytoy a nangsungbat iti saludsud kenkuana no agpaidasig manen a para mayor iti sumaruno nga eleksyon.
