LAOAG CITY – Maisaysayangkat ti maysa World Window Cleaning Cup tinawen no sadinno agtitipon dagiti professional cleaners manipud iti nagduduma a pagilian idiay London.
Ipakpakita ti nasao nga kompetision ti window cleaning kas panagsanay a kasapulan ti training, alisto a garaw ken umdas a kontrol.
Iti daytoy, saan laeng a kinaalisto nga agdalus ti kitaen no diket ti resulta, rumbeng nga awan mantsa wenno teddak ti danom.
Maysa kadagiti sikat a nakipaset ket ti agtawen 71 a ni Terry Burrows a nabigbig kas “Usain Bolt” ti window cleaning.
Idi 2009, nagun-od ni Burrow ti world record kalpasanna a dinalusan ti tallo a 45 a pulgada a tawa iti uneg iti 9.14 a segundo no sadinno agingga ita, awan pay ti nakaburak iti daytoy.
Iti akwal a kompetision, agpapada ti usar dagiti makipaset kas iti squeegee, applicator, lupot a pangdalos, timba ti danom ken detergent ken kasapulan a dalosan ti tallo a tawa iti naalisto nga oras.
Tallo a judges ti manginspeksion iti resulta. Tunggal bassit a teddak ti danom ket adda nayonna a 0.5 a segundo, kabayatan nga ad-adda a nadagsen ti mantsa a ti nayonna ket maysa a segundo.
Gapu iti daytoy, saan nga umdas ti kinaalisto no diket kasapulan pay a perpekto ti panagdalus.
Ti mangabak ket magun-odna ti 1,000 British pounds ngem para kadagiti nakipaset, ad-adda a napateg ti pammadayaw kas kalalaingan nga agdalos ti tawa iti sangalubongan.
