LAOAG CITY – Ilunglungalong ti kamara de representantes ti pannakaaprubal ti nailungalong a gakat a mangipangato ti binolan a cash grant iti babaen ti Pantawid Pamilyang Pilipino Program (4Ps) para iti edukasyon, salun-at ken nutrisyon.
Daytoy ti inbatad ni House Majority Leader Alexander “Sandro” Marcos.
Segun ken ni Marcos, ikarkarigatan ti House Committee on Appropriations nga ipasa ti gakat nga addaan ti dakkel nga implikasyon iti budget.
Inlawlawag na a ti pannakaipasa ti napagtitipon a gakat para iti Pantawid Pamilyang Pilipino Program ket napateg tapno mapapigsa ti suporta para iti edukasyon, salun-at ken nutrisyon.
Innayon na a makatulong daytoy iti gobierno a mangipaay ti nabaybayag a tulong para kadagiti kwalipikado nga umili.
Kuna pay ni Marcos a kalikagom da a mapapigsa ti social protection para kadagiti pamilya a nababa ti mapaspastrek na iti pagilian.
Iti babaen ti gakat, ti binolan a tulong pinansya ket maipangato manipod P300 mapagbalin a P500 para iti daycare ken elementary pupils; manipod P500 mapagbalin a P700 para iti junior high school students, ken manipod P700 mapagbalin a P900 para iti senior high school students, agingga iti 10 a bolan iti kada tawen.
Ti met binolan nga health grant ket maipangato manipod iti P750 ket mapagbalin a P1,800, ken dagiti ubbing nga addaan ti rangkap ti bagina ket makaawat ti nayun a P400 iti kada bolan tapno masuportaran ti pagkasapulan da iti medikal.
