LAOAG CITY – Kinumpirmaran ni Police Captain Johnveil Maramag, chief of police ti PNP-Marcos a nakabkabil ken naagawan ti paltog ti maysa a kameng ti BJMP.
Binigbig ni Maramag ni kameng ti BJMP a ni Jail Officer 1 Kernel Salidamos, residente iti Barangay Valdez iti nasao nga ili idinto a dagiti maipagarop a nangkabkabil ket da Jerry Peralta ken Mark Peralta a taga ili ti Dingras.
Ummuna iti daytoy, kuna ni Maramag a dagiti dua a Peralta ken napan nagatendar iti maysa a pasken iti Barangay Lydia iti ili ti Marcos.
Inlawlawag na a limmabas ni Salidamos ken nagsardeng gapo ta aganawa kuma iti komosyon a nalabsan no sadinno a napabigbig a kameng ti BJMP ken posible a saan a naawatan ti bangir a grupo.
Inbatad na a basar iti naala da nga impormasyon, idi saan a makaanawa ni Salidamos ket inruwar na ti paltog na ngem inagaw da daytoy ken kinabkabil da pay ti maseknan.
Kunana a ti paltog ni Salidamos ken insuko dagiti maseknan iti kwarpo ti pulisya iti ili ti Dingras ngem iti agdama ket addan iti kutudiyar ti PNP-Marcos.
Mainaig iti daytoy, kuna ni Maramag nga adda ti narekobre da a maysa a basyo ti bala ken ipadalan da iti ballistic examination tapno madeterminar no naggapo iti paltog ni Salidamos daytoy gapo ta inpetteng ti kameng ti BJMP a saan na a pulos kinalbit ti paltog na a Caliber 9MM.
Innayon na a posible a nakalbit ti paltog iti madama ti panaggi-innagaw da.
