LAOAG CITY – Naarestar ti drug surrenderee a kameng ti LGBT Community ken maibilang kas Rank No. 6 iti Drug watchlist iti provincial level iti naisayangkat a drug buy-bust operation iti sango a mismo ti balay da iti paset ti Barangay 1 iti ili ti Vintar.
Nabigbig daytoy a ni Derrick Agcaoili, agtawen ti 46, drug surrenderee ken residente met laeng iti nadakamat a barangay.
â–ºKameng ti LGBT a natiliw babaen ti buy bust operation, sumango ti reklamo a panagsalungasing iti RA 9165
Naglako ni Agcaoili ti maysa a sachet a naglaon ti maipagarop a shabu nga agbalor ti sangaribo a pisos ken iti panangkapkap dagiti otoridad ket nakakumpiskar da pay ti
4 a sachet a naglaon met laeng ti maipagarop a shabu.
Inpetteng ni Agcaoili nga awan ti ammo na kadagiti naala kenkuana nga illegal a droga.
Inadmitir na a nagus-usar idi ti droga ngem nabayagen nga insardeng na gapu ta addan uppat a tawen ti napalabas.
Kabayatanna, inbatad ni Agent Bencamilo Javier Jr. Iti Philippine Drug Enforcement Agency (PDEA) a nabayag dan a monmonitoren ti suspek sakbay nga insayangkatan da ti operasyon.
Inbatad na a basar iti panagmonitor da ket aggapo idiay Metro Manila dagiti illegal a droga nga ilaklako ti suspek, ngem saan nga isuna a mismo ti mapan mangal-ala no di ket adda ti mapan mangideldeliver kenkuana.
Mainaig iti daytoy, inbatad ni Barangay Chairman Cesar Bonoan iti Barangay 1 iti ili ti Vintar a saanda a ninamnama a nagsubli iti illegal nga aktibidad ni Agcaoili.
Inadmitir na a nakigtot gapu ta ti laeng ammo na idi ket agus-usar ti illegal a droga ni Agcaoili ken saanna a ninamnama nga aglaklako pay daytoy.
Nupay kasta, kuna na nga adda ti panagatap na a sabali manen ti ar-aramiden na kalpasan nga adda dagiti mangibagbaga kenkuana nga iluglugan da ti suspek iti tricycle ken mapan da itultulnog ditoy ciudad ti Laoag.
Inpakaammo pay ti kapitan nga ado ti rekord ti suspek iti ili da gapu ta maipagarop a mannakiapa, saan laeng nga iti barangay da no di ket iti nagduduma a barangay iti nasao nga ili.
