LAOAG CITY – Napaltogan ti maysa a kameng ti Lesbian, Gay, Bisexual, Transgender and Queer wenno LGBTQ Community iti Sitio 6, Brgy. Medina iti ili ti Dingras.
Nabigbig ti biktima a ni Nanette Santos wenno ad-adda nga am-ammo iti nagan a Gugay, agtawen ti 44, negosiante ti buy and sell ti baboy ken residente iti Brgy. Upig, San Ildefonso, Ilocos Sur.
Basar iti Dingras Municipal Police Station, kabayatan a naka-parking ti nagluganan ti biktima a Mitsubishi Montero nga addaan ti plate number a CAK 8470 iti asideg ti maysa nga International Event Center kaduana dagiti tallo nga indibidual nga isuda Mark Vincent Yere, Crystal Ingan, agpada a residente iti Sinait Ilocos Sur ken Arlene Poller, residente iti San Ildefonso, Ilocos Sur ket kellaat nga adda ti immasideg kadakuada a nakamotorsiklo ket ditoy pinaltoganda ti biktima iti naminsan a daras.
Gapu iti daytoy, natamaan iti barukong ti biktima ken dagus a naitaray iti Doña Josefa Edralin Marcos Hospital ngem naiyakar iti Mariano Marcos Memorial Hospital and Medical Center iti siudad ti Batac.
Dagus met a naglibas dagiti saan pay a nabigbig a suspek a nagturong nga agpa-amianan.
Naammoan a nakatugaw iti driver’s seat ti biktima idi napasamak ti insidente.
Rumrummuar iti imbestigasion nga agur-uray ti biktima ken dagiti kakaduana para iti transaksion ti panaggatang ken pannakailako dagiti baboy.
Kabayatanna, narekobre ti maysa a pedaso ti deformed fired bullet ken maysa a pedaso ti empty shell ti Calibre 45.
Iti agdama, manarimaan ti panangimbestigar dagiti otoridad ti ala ti Close Circuit Television camera a nakaimuntar iti asideg iti nakapasamakan ti pammaltog tapno makatulong iti panagtalidtid ti kaso.
