LAOAG CITY – Nangisubmitir ti kampo ni dati a Presidente Rodrigo Duterte ti napagtipon a report manipud kadagiti innalada a medical experts.
Segun iti abugado ti dati a Presidente a ni Nicholas Kaufman, daytoy nga addang ket kas suporta iti rakurakda ti pudno a kasasaad ti salun-at ti agtawen ti 80 a dati a Presidente no apay a kasapulanen daytoy a waya-wayaan manipud iti pannakaibaludna iti International Criminal Court (ICC) facility.
Iti 12 a panid a report nga insubmitirda iti International Criminal Court Pre-Trial Chamber I a nangibaga a ti baro a medical evidence ket kas panangsuporta iti Pre-Trial Chamber iti salun-at ti dati a Presidente para iti panangsango daytoy iti panagdengngeg.
Nailanad iti joint report a ti dati a Presidente ket agkurkurang ti executive functioning, kinakurang ti kapasidad nga agplano, kurang iti alisto a panagdesision, agkurkurang iti pigsa a pisikal ken awan ti abilidad a liklikan ti panagbantay.
Gapu iti daytoy, awan ti kabaelan ti dati a Presidente a pangtaan dagiti saksi ken dadaelen ti integridad ti imbestigasion.
Kiniddaw ni Kaufman a nasken nga adalenen ti Pre-Trial Chamber ti panangaprobar ti interim release ni Duterte gapu kadagiti nadakamat a kondision ti dati a Presidente.
Maipalagip nga idi Disiembre 5, 2025 ket nangdutok ti International Criminal Court ti panel of experts a mangtingiting iti salun-at ti dati a Presidente no kabaelanna daytoy nga agatendar iti panagdengngeg iti kasona.
Kabayatanna, nagtalinaed a nakabalud ti dati a Presidente gapu iti kaso a crime against humanity manipud iti kampania kontra iti iligal a droga idi isuna ket Presidente pay laeng ditoy pagilian kasta met idi Mayor daytoy idiay Davao City.
