LAOAG CITY – Nagballaag ti kampo ni dati nga House Speaker Martin Romualdez a possible a mapilit ni dati a Department of Public Works and Highways (DPWH) Secretary Manuel Bonoan nga iraman ti agpanpanday linteg iti imbestigasyon ti Office of the Ombudsman mainaig iti maipagarop a flood control scam.
Segun ken ni Atty. Ade Fajardo, ti pannakangiwat ni Romualdez, awan ti maipakita nga ebidensya a mangikonkonektar iti dati nga speaker iti kaso ken agtalinaed laeng dagiti alegasyon a pammabasol kontra iti agpanpanday linteg.
Inbatad pay ni Fajardo a makaalarma dagiti report a mabalin nga agtestigo ni Bonoan kontra ken ni Romualdez, idinto a nasuruken a maysa a tawen sipud rimuar ti isyu ngem saan pay a nagsarsarita kontra iti dati nga Speaker.
Innayon na a possible a makapasar ti nakaro a pressure ni Bonoan gapu ta adda iti hospital arrest daytoy ken mabalin a maiyakar iti regular a pagbaludan no palubusanen dagiti doktor.
Iti agdama, kuna ni Fajardo nga awan pay ti naawat da a subpoena manipod iti Office of the Ombudsman ken nakasagana da a mangsungbat ti aniaman a reklamo no mangrugin ti pormal nga imbestigasyon.
