LAOAG CITY – Inadmitir ni Barangay Chairman Jerry Aguilar iti Barangay 7, San Manuel iti ili ti Sarrat nga agsingsingir ti barangay kadagiti mangala ti Certificate of Indigency.
Daytoy ket kalpasan nga inpadanon ti maysa a residente ditoy Bombo Radyo a pabayadan ti barangay ti nasao a sertipikasyon nga usaren da para iti panagpatulong da iti opisina ni Cong. Sandro Marcos.
Segun kenni Aguilar, idi kagawad pay laeng isuna ket adda ti pinutar da nga ordinansa seknan iti daytoy ken insubmitir da iti Office of the Sang. ken naaprubaran daytoy.
Kunana nga addan ti lima a tawen a kastoy ti ar-aramiden ti barangay ken ti Certificate of Indigency ket mabayadan ti 50 a pisos ken ti maukkon ket sumrek a mismo iti barangay.
Inlawlawag na nga awan met pay ti naibagbaga kadakuada a maiparit daytoy ken saan laeng nga iti barangay da ti mangipatpatungpal iti daytoy.
Kabayatanna, kunana a no dumanon no kenkuana ti mandar ni Cong. Marcos ket pagsasaritaan da kadua na dagiti barangay officials no anya ti sumaruno nga aramiden da.
Inpetteng na nga ammo met dagiti kabarangayan na a kastoy ti maipatpatungpal da rason a saan na a maawatan no apay nga ita laeng a maireklamo daytoy.
