LAOAG CITY – Mamati ni Barangay Chairwoman Marilyn Resquir iti Barangay Cabungaan-A ditoy ciudad ti Laoag nga adda ti maris pulitika na ti isyu iti idaulwan na a barangay.
Daytoy ket mainaig iti pannakadispalko ti dati a barangay treasurer da iti agarop 300 a ribo a pisos a pondo iti barangay da.
Inlawlawag ti kapitana nga awan ti ammo na iti napasamak ken addan ti inaramid nga affidavit ti dati a treasurer da a nangibagaan na nga awan ti pakainaigan ni Resquir iti inaramid na.
Kuna pay ti kapitana a nabayadanen ti dati a treasurer da ti nasao a gatad ken nagpadespensar iti konseho ken iti barangay assembly da.
Inadmitir ni Kapitana Resquir a ti laeng kamali na ket nagtalek iti dati a treasurer isut gapuna nga uray blangko dagiti tseke ket pinirmaan na latta.
Immunan nga inlawlawag ni Resquir a sakbay a nakaawat ti Notice of Dis-allowance manipod iti konseho ket addan ti panangawag ti Commission on Audit (CoA) iti atensyon na a saanna nga ammo gapu ta maipagarop a saan nga inpakpakaammo kenkuana ti treasurer na.
Innayon na nga inpakaammo na daytoyen iti konseho ken isudan ti agim-imbestigar.
