LAOAG CITY – Naiget a naglikudan ni Barangay chairman Gilbert Martillano iti Barangay Nangalisan-A ditoy ciudad ti Laoag ti alegasyon kontra kenkuana.
Daytoy ket mainaig ti maipagarop a pananghar-harass na kadagiti kabarangayan na a saan nga umanamong a maipatakder ti cell site iti barangay da.
Rumrumuar nga agkedked dagiti sumagmamano a residente nga adda ti maipatakder a cellsite iti barangay da gapu ta agamak da amangan no maapektaran da ti radiation.
Nupay no kasta, kuna ti Kapitan nga iyuray da lattan ti agbalin a desisyon ti konseho ditoy ciudad gapu ta naidanunen ti reklamo kontra kenkuana.
Kabayatanna, inpasingked ni Mr. Jerald Calamaan, IT Officer ditoy ciudad ti Laoag nga awan ti rumbeng a pagdanagan dagiti residente nga adda iti asideg ti cellsite.
Segun ken ni Calamaan, agpayso nga adda ti radiation ti cellsite ngem kabaelan ti bagi ti tao a labanan.
Innayon na a narisrisgo pay ti radiation ti nakaanta ti headset iti lapayag ti maysa a tao kabayatan a makitawtawag iti cell phone iti uneg ti 10 a minutos agpangato.
