LAOAG CITY – Inlawlawag ni Brgy. Chairman Glendford Paguirigan iti Barangay Sta. Maria ditoy ciudad ti Laoag no apay saan da a dagus a pinadalan ti maysa a fish dealer iti barangay da.
Daytoy ket gapu ta madalanan ti nasao a fish dealer ti barangay da iti panagturong na iti Barangay La Paz ditoy ciudad.
Inbatad ni Paguirigan a ti pammilin kadakuada ti PNP-Laoag ket masapol nga amin a truck dagiti fish dealer ket agderetso da iti Central Terminal.
Kuna na nga iti Central Terminal ket agdisinfect dagiti maseknan sakbay a mapan da agdeliver ti lako da iti tiendaan.
Innayon na a kalpasan a maibaba da dagiti ikan ket agsubli da met laeng iti central terminal.
Nupay kasta, kuna ni Paguirigan nga iti panangipakaammo da daytoy a banag iti City Administrator ditoy ciudad ket naamoan da nga adda ti sabali a nagsasaritaan da isut gapuna a naibilin kadakuada a palubusan dan ti fish dealer a mapan iti Barangay Lapaz.
Kuna na nga uray ti PNP ket kastoy ti nagbalin a pammilin da kadakuada.
Nupay kasta, masapol a madisinfect ti truck sakbay nga agawid iti barangay da.
Inpakaammo ni Paguirigan a dagiti laeng fish dealer ti naiget a monmonitoren da gapu ta isuda ti kanayun nga agbiyahe iti ruwar ti Ilocos Norte ken ti panagawat na ket agtalinaed dagitoy iti central terminal kalpasan a makaibaba da iti tiendaan ditoy ciudad ti Laoag.
