LAOAG CITY – Naglikudan ni Brgy. Chairman Romeo Macadangdang iti Brgy. Tubburan iti ili ti Bacarra ti alegasion kenkuana a maipagarup nga iyakarna ti kagudua ti kalsada a masemento para iti farm to market road project.
Inbatadna nga immay nakisarita ti Municipal Engineer ken Department of Public Works and Highways kenkuana nga adda ti maipatungpal a proyekto iti barangayda nga agdagup iti 20 a milyon a pisos.
Inlawlawagna a saan met nga isuna ti maysa a klase ti Kapitan a saanna nga ipaleppas ti proyekto iti uneg ti barangayda nangruna ket para iti pagnam-ayan amin daytoy.
Kunana a napaay idi naduktalanna a saan met a maileppas ti nasao a proyekto banag a maladingitan daytoy iti nagbalin a resultana.
Gapu iti daytoy, kalikagumna a makasarita a naimbag ti Municipal Engineer inton Lunes maipanggep iti nadamat a proyekto kagiddan ti panagatendar dagiti dadduma pay a maseknan nga indibidual.
Mainaig iti daytoy, inpetteng ni Kapitan Macadangdang a saan a nairanta para iti piggery-na ti masemsemento a dalan no di ket kalsada para iti amin a residente.
Innayonna nga agkurang ti rukud wenno area ti masemento a kalsada rason a nagbirukda iti pakaisementoanna a sabali isu a napilina ti lugar a mamagkamang iti piggery-na agsipod ta awanen ti sabali a lugar a mabalin a pakaipatungpalanna.
Kabayatanna, naammoan nga addan ti sumurok 10 a tawen nga agserserbi kas Kapitan ni Macadangdang ken daytoy ti maudi a terminona.
