LAOAG CITY – Inlawlawag ni P/Sr. Insp. Joel Castillo, hepe ti PNP Sta. Maria iti probinsya ti Ilocos Sur ti napasamak a pammagkong iti Poblacion Norte iti sango ti Polytechnique State College iti nasao a probinsya.
Kuna na a nagriri da Barangay Chairman Rumulo Gabriel Jr., agtawen ti 38, residente ti Bgry 26 ditoy siudad ti Laoag kenni Arnel Manalili, agtawen 54, kondoktor ti bus, ken resdiente iti Pigurasion St. Poblacion 3 iti ili ti Pasuquin.
Inbatad ni Castillo a nangiwayat dagiti dua ti inspeksyon ti Fariñas bus idiay Sta. Maria ken dita a timpuar ti saan da a panagkinnaawatan.
Segun kenni Castillo, idi nakababan ni Rumulo iti bus ken napan iti pribado a lugan na ket dita a dinarup a binagkong ti kondoktor ti biktima.
Nagsagaba ti biktima ti bagkong iti barukong, takyag ken ti abaga na nken dagus a naitaray iti Metro Cooperative Hospital iti ili ti Bantay Ilocos Sur.
Innayon ni Castillo nga agtultuloy ti operasyon da kontra kenni Manalili a nakataray kalpasan ti panangbagkong na kenni Kapitan Rumulo.
