LAOAG CITY – Kinumpirmaran ni Brgy. Captain Rodel Cristobal Legazpi iti Brgy 34-B, Gabu Norte East a 200 a pisos ti singsingiren iti barangay kadagiti residente kas filing fee para iti panangiparuk-at da ti summon.
Daytoy ti inbatad na kalpasan a natratar daytoy iti uneg ti Sangguniang Panlungsod kabayatan ti regular session nu sadinno a rumrumuar a nangina unay ti filing fee.
Segun kenni Legazpi, tawen 2021 idi inrugi da nga inyimplementar daytoy a banag kalpasan nga insubmitir da ti pinutar da nga ordinansa iti Sang. Pnlungsod partikular iti Secretariat Office no sadinno nga awan iti nagbalbalin a sungbat ti Konseho.
Inlawlawag ti kapitan nga inpakaammo ni Mr. Enrico “Poco” Aurelio, ti dati a sekretaryo ti Sangguniang Panlungsod kadagiti opisyales iti barangay Gabu Norte a no mangipasa da ti maysa nga ordinansa ken awan tisungbat ti Konseho kalpasan iti 30 nga aldaw ket otomatiko a maimplementar.
Kuna ni Legazpi a no kuma nasungbatan daytoy ken naipakammo a nangina unay daytoy ket saan da kuma nga inpatpatungpal.
Gapo met iti rakurak ti Sangguniang Panlungsod, kuna ti kapitan nga saan da nga agsingsingir pay laeng kadagiti kabarangayan da iti filing fee agingga nga adda ti baro nga ordinansa ken aprubaran ti konseho ditoy ciudad.
Kabayatanna, patyen ti kapitan nga adda ti maris politika na daytoy a banag gapo ta ita laeng nga umadanin iti barangay eleksiyon a matratar daytoy a banag.
