LAOAG CITY – Inpetteng ni Barangay Chairman Noli Tunac iti Barangay 5 iti ili ti Vintar a maysa laeng a konsehal iti barangay da ti makaammo iti panagtrabahao dagiti residente para iti TUPAD Program.
Segun kenni Tunac, ni Kagawad Bibing Calsada ti mismo nangala kadagiti 40 a tattao ngem saan naipakammo kadakuada ken arig na ket tungpa kenkuana daytoy kas maysa a kapitan wenno ama iti barangay da.
Inlawlawag na nga uray saanen a naipakammo kadakuada ngem dagiti kuma rumbeng nga agtrabaho ti napili a benipisyaryo iti nasao a programa.
Nupay kasta, kunana a saan met a dagiti kwalipikado ti napili gapo ta maipagarop nga arig na ket adda ti sabali a gagem.
Daytoy ket gapo ta maipagarop a kaadoan a pinili ti kagawad na ket dagiti babaknang.
Inpalgak na no saan na pay a kinastigar ket saanen nga agtrabaho dagiti maseknan, imbes ket mapan da lattan agawat ti sweldo.
Kwinestyunaran pay ti kapitan ti DTR gapo ta blango daytoy ngem adda met ti permi ti akin-nagan.
Kunana a kalpasan daytoy ket adda ti 11 nga indibidual tu nagtrabaho iti ummuna nga aldaw, 20 iti maikadua nga aldaw ken iti sumaruno nga aldaw ket agarop 30 ngem maysa laeng met nga oras ti panagtrabaho da.
Inbatad na pay nga adda ti panangibilin na kadagiti maseknan a madalusan ti kanal ngem saan a nagtungpal dagitoy.
Dinakamat na pay a ti nangpili kadagiti benipisyaryo ket isu kuma met laeng ti mangbantay kadagitoy tapno saan a masayang ti kwarta a maited kadagitoy.
Mainaig iti daytoy, kunana a masdaaw no apay a saan a naipakammo kenkuana ken iti Barangay Council iti panagala ti kagawad kadagiti agbalin a benipisyaryo iti daytoy.
Kabayatanna, inpetteng na a ti laeng pirmaan na a dokumento ket dagiti iggem dagiti nakita na a napan nagdalos kas gunguna met dagitoy iti panagtrabaho da.
