LAOAG CITY – Nakaawat ti maipagarup a bomb threat ti Kapitolio Probinsial ti Ilocos Norte.
Daytoy ket kalpasan nga adda ti naawat a tawag ti Provincial Administrator’s Office babaen ti landline.
Gapu iti daytoy, dagus a rimmuar dagiti amin nga empleado ti Kapitolio Probinsial.
Indauloan ni P/Col. Frederick Obar, Provincial Director ti Ilocos Norte Police Provincial Office ti pannakaiwayat ti imbestigasion iti uneg ken ruar iti Kapitolio Probinsial.
Mainaig iti daytoy, saan pay a masinunuo dagiti otoridad ti pakabigbigan ti indibidual a timmawag iti Provincial Administrator’s Office.
Kabayatanna, nakaawat pay ti bomb threat ti lokal a gobierno ditoy siudad ti Laoag.
Iti agdama, agtultuloy ti pannakaiwayat ti imbestigasion maipanggep iti napasamak a bomb threat.
Maipalagip nga iti napalabas a tawen ket nakaawat met ti bomb threat ti Mariano Marcos State University ken Immaculate Conception Academy iti siudad ti Batac no sadinno a negatibo wenno awan ti nasarakan a bomba iti uneg dagiti dua a pagadalan.
