LAOAG CITY – Inbatad ni Atty. Neri Colminares a masapol ti dua a factual basis ti martial law kas iti rebelyon ken public safety.
Daytoy ket gapo ta ti factual basis ti kangrunaan a saludsuden dagiti agpanpanday linteg seknan ti pannakaiyalud-od ti martial law iti lima a bulan.
Inbatad na a masapol a pagdedebatean iti maiyuswat a joint session ti Kamara ken Senado no apay a lima a bulan ti kiniddaw ni Presidente Rodrigo Duterte nga extension ti martial law idiay Mindanao.
Segun kenni Colminares, maysa kadagiti takkel a saludsod ket ti Zamboanga siege no sadinno nga adda ti napasamak nga aerial bombing ken house-to-house combat nupay awan ti naideklara a martial law iti lugar.
Kunana a masapol a matratar no ania ti punto ti administrasyon a nangideklara ti martial law idiay Mindanao nupay ti rebelyon ket iti Marawi City laeng.
Inlawlawag na a maapektaran ti apektado ti ekonomiya ti maysa a lugar no adda ti martial law uray awan met ti rebelyon.
Nupay kasta, inbatad ni Colminares nga awan iti konstitusyon a mangiparit ti agkiddaw ti extension ti martial law ngem masapol nga adda ti pagbasaran na.
Daytoy ket gapo ta posible a saanen nga umabot ti lima a bulan ti rebelyon idiay Marawi City.
Inpetteng ni Colminares nga adda ti maaw-awagan nga “stop the clock” no sadinno nga agtultuloy ti debate agingga iti alas-singko ti parbangon seknan ti pannangtratar iti pannakaiyalud-od ti martial law.
Innayon na nga awan ti nakita na nga eksplanasyon ti administrasyon iti panangideklara ti martial law iti nasao a rehiyon.
