LAOAG CITY – Kinumpirmaran ni Mayor Jeofrey Saguid iti ili ti Dingras nga adda dagiti baboy a nagpositibo iti African Swine Fever (ASF) iti Brgy. San Marcelino iti nasao nga ili.
Gapu iti daytoy, inbatad na nga umabot iti 286 a baboy ti naikali tapno maliklikan ti panagwaras ti virus.
Inpakaammo ni Saguid nga adda ti natay a baboy iti Brgy. San Marcelino isut gapu na a naiyuswat ti testing kadagiti baboy ket naduktalan nga adda ti positibo.
Kabayatanna, kuna ti Mayor a malaksid iti Brgy. San Marcelino ket naiget a mabanbantayan ti Brgy. Gabut manipod iti pangta ti ASF.
Immunan nga inpakaammo ni Saguid a posible nga iti danom a maus-usar kadagiti baboy iti Brgy. San Marcelino ti naggapoan ti virus.
Maipalagip a karaman nga adda iti pink zone iti ili ti Dingras kalpasan a nakumpirmaran ti kaso ti ASF iti ili ti Solsona.
