LAOAG CITY – Inanunsio ti World Health Organization a nangipaay daytoy ti prequalification approval iti maysa a malaria treatment para kadagiti maladaga iti kaunaan a gundaway.
Ti Artemether-lumefantrine ket isu ti umuna nga antimalarial formulation a nakadisenio para kadagiti kaubingan a biktima ti mosquito-borne disease.
Agingga kadagitoy a gundaway, dagiti maladaga ket ag-agasan ti formulation para kadagiti dakdakkelen nga ubbing a mangitunda ti risgo iti dosage errors, side effect ken toxicity.
Idi 2024, mapatta-patta a 282 milyon a malaria cases ti nairekord ken 610,000 ti natay iti 80 a pagilian.
Manipud iti Africa ti 95 a porsiento dagiti kaso ken natay no sadinno a kaadoan kadagiti ubbing ket agtawen ti lima agpababa.
