LAOAG CITY – Pormalen a nalukatan ti kaunaan nga opisina ti state of Hawaii ditoy probinsia a maibilang a kaunaan nga opisana da a naipasdek iti intero a pagilyan.
Segun kenni Ms. Mary Jose, Assistant Director, State of Hawaii Overseas office ditoy pagilyan, ti nasao nga opisina ket agbalin a sentro ti kolaborasyon ken panagkikinammayet ti dua a pagilyan.
Kunana a namnamaen dagiti pilipino a babaen iti nasao nga opisina ket ad-adda pay a napinpintas ti pannakaiyimplementar dagiti programa ken proyekto ti Hawaii kas koma iti benneg iti ekonomiya, turismo, sports ken edukasyon.
Malaksid iti daytoy, amwen da kadagiti nagduduma nga ahensya no ania dagiti mabalin a pagsisinnukatan iti ideya ti dua a pagilyan.
Kabayatanna, dinakamat na pay ti J1 Program no sadinno a narway a mangisursuro ditoy pagilyan dagiti nanggundaway iti daytoy ken maikkan ti oportunidad no agsubli da ditoy pagilyan.
Inpanamnama na met ni Jose a saan da nga ipalubos nga amin dagiti mangisursuro ditoy pagilian ket agturong da iti Hawaii tapno saan a maibusan ti pagilyan.
Kabayatanna, nagyaman ni Governor Cecilia Araneta Marcos, iti pannakaipatungpal ti pannakaestablisar ti nasao nga opisina kadagiti mangbukbukel ti state of Hawaii overseas office.
Kunana a gapu iti daytoy ket ad-adda manen a maibaga a ti Hawaii ti 3rd district ti Ilocos Norte.
Inpakaammo na pay nga adda ti personal a koneksyon na idiay Hawaii gapu ta inyanak na ti inauna nga anakna iti nasao nga isla.
Innayon na nga iti laeng napalabas a tawen ket napagsasaritaan da daytoy a banag, isut gapuna a maragsakan unay iti naan-anayen a pannakaestablisar ti nasao nga opisina ditoy probinsya.
Mamati ti gobernador a babaen iti nasao nga opisina ket ad-adda pay a mapatibker ti relasyon ti Pilipinas ken ti isla ti Hawaii.
