LAOAG CITY – Maysa a restaurant idiay New South Wales, Australia a nagluto ti 1,212 pounds wenno 550 kilos a Kebab ken French Fries ti nakagun-od ti Guinness World Record.
Inpannakkel ti King Kebab House iti Campbelltown, New South Wales iti Campbelltown Street Festival babaen iti panagluto ti 1,212 pounds a kebab meat ken french fries a nagresulta iti baro a Guinness World Record title a “World’s Largest Serving of Doner Kebab Meat and Chips.”
Nagusar ti restaurant ti sumurok 1,300 pounds ti manok ken baka pakairamanan ti 660 pounds ti patatas tapno makaaramid ti 660 pounds a kebab ken 552 pounds ti french fries.
Naidasar ti taraon kadagiti lamisaan nga addaan ti pakabuklan nga atiddogna a sumurok 300 a kadapan sakbay a maidasar iti festival goers.
Inbatad ni Mevlana Cifci, akinkukua ti King Kebab House, ti world record attempt ket wagas ti panagyaman iti komunidad ti Campbelltown.
