LAOAG CITY – Ibilang ni Asst. Regional Director Freddie Lazaro iti Philippine Information Agency (PIA) a napintas ti kiddaw ni Sen. Imee Marcos mainaig iti naan-anay a protesyon kadagiti kameng ti media.
Segun kenni Lazaro, dakkel a tulong daytoy kadagiti agirakrakurak gapo kadagiti pangta iti biag a maaw-awat mainaig iti trabaho da.
Nupay kasta, kuna ni Lazaro a saan kuman a dumalan daytoy iti atiddog a proseso para iti insigida a pannakaipaay ti proteksyon gapo iti kinarisgo ti biag dagiti maseknan bayat ti panagtrabaho da.
Inbatad na a gapo iti trabaho ti media ket ado dagiti madalapos kangrunaan na dagiti adda iti aramid na a mangitunda met ti pannakaipangta ti biag dagiti maseknan.
Maysa pay a rason nga inbatad ni Lazaro a napintas ti napanunutan ti senador ket gapo ta saan nga ammo dagiti kameng ti media no siasinno dagiti kalaban na ken awan ti naan-anay nga armas da malaksid laeng ti ballpen ken mikropono.
Maipalagip a kiniddaw ni Sen. Marcos iti NBI ken PNP ti pannakaipaay ti proteskyon dagiti adda iti media kalpasan ti pannakatake ken pannakauram ti maysa a media news outlet babaen kadagiti armado a lallaki.
