LAOAG CITY – Maiwayat ti kinni-kinni Parade inton Marso 8, 2024 ditoy probinsiya a kas paset iti selebrasyon ti Women’s month.
Daytoy ti inbatad ni Mrs. Janet London, mangidadaulo ti Gender and Development office.
Impalgakna a daytoy ti 12 a tawen a pannakaiyuswat na a narugian manipod pay idi ni gobernadora ni Sen. Imee Marcos ditoy probinsia.
Inlawlawagna a kas iti napalabas a tawen ket dagiti maibilang nga straight men ken agserbi a muse ket nasken nga agarwat a pangbabai ken agusarda iti pointed a high heels.
Imbatadna a kadagiti kallabes a tawen ket nangpili lang dagiti judge ti naikkan ti number ken dagitoy ti na-qualify para iti semifinalist ngem ita a tawen ket maummong amin a muse ken mammaminsan nga agrampa dagitoy ti sango ken ditoy a mangpili dagiti judges ti sangapulo a sumrek iti semifinals ken a mapili kas kinni-kinni queen.
Malaksid iti daytoy, inbunannagna nga adda met laeng ti mapili a best kinni-kinni group ken most colorful group.
Ti nasao nga aktibidad ket pakipagpasetan dagiti amin a local government units ken nagduduma nga organisasyon ditoy probinsya.
Kabayatanna, immun-unan a naiwayat ti Run for Gender Equity” idi Marso 2 no sadinno a dagiti partisipante ket nagtaray ti tallo a kilometro manipud ti sangoanan ti kapitolio probinsial.
