LAOAG CITY – Binigbig ni dati a senador Ferdinand Bongbong Marcos Jr. ti dakkel nga akem ti Department of Education iti panagdur-as a pakairamanan ti nasayaat a pannakamuli dagiti atleta.
Segun kenkuana, naruay a tattao ti mamati a dagiti kompetision iti ay-ayam kas iti Region One Athletic Association meet ket maysa laeng a wagas iti panagragragsak ken panagay-ayam.
Mainaig iti daytoy, kuna ti senador a pudno a rumbeng iti panagragragsak ngem adda pay ti naun-uneg ngem iti daytoy gapu ta iti proseso, maik-ikkan ti gundaway dagiti agtutubo a makipartisipar kadagiti maiyasping a kompetision tapno ad-adda pay a maasa ti kabaelan da a mangitunda kadakuada ti balligi.
Inbunannagna a karaman ditoy ti panagsakripisio, disiplina, pannakigayyem ken patas a panagay-ayam.
Imbatadna a dagitoy ket napateg iti panagballigi saan laeng a dagiti mangabak nga atleta ngem amin nga atleta.
Inlawlawag ti dati a senador a dagiti maisaysayangkat a kompetision ti pay-ayam ket saan laeng a pangmulian kadagiti atleta nga agbalin a kampeon iti masangoanan ngem napintas a pangmulian kadagiti nasayaat a lider iti pagilian.
Kinaritna dagiti amin nga atleta a mangimula iti panunut da a ti kapatgan ket ti panangaramid da iti amin a kabaelan da iti ay-ayam a pakilabanan da.
