LAOAG CITY – Patien ni Sang. Panlungsod Member Dereck Lao a mangitunda ti desgrasya dagiti barikada iti paset ti Gilbert Bridge partikular iti agturong iti ili ti San Nicolas nangruna iti rabii.
Segun kenni Lao, awan dagiti reflectorize stickers wenno pakakitaan nga adda dagiti nasao a barikada a landok iti paset ti rangtay
Malaksid iti daytoy, patien pay ti konsehal a naalas a kitaen gapo ta daytoy ket maysa a landmark ti ciudad nga ummuna a makita dagiti bisita.
Gapo iti daytoy, insuhestyun ni Lao ket maidanon daytoy a problema iti Dept. of Public Works and Highways (DPWH) nangruna ket maibilang daytoy a National Road.
Kunana a no mabalin ket masukatan daytoy iti orange plastic barriers nga adda ti reflectorized sticker na.
Mainaig iti daytoy, inpetteng na a masapol nga adda ti reflectorized sticker iti kada 100 a metro a mapan iti laud nga adda dagiti plastic barrier.
Kidkiddawen pay ni Lao kenni Mayor Michael Marcos Keon ti konseho iti tulong na mainig iti daytoy a banag.
Inpalagip na pay nga inpakammo na daytoyen a banag bayat ti 11th Sanguniang ngem nangted laeng ti ahensya ti bassit plastic barrier.
Kabayatanna, kalikagom na a masukatan amin daytoy ti plastic barrier ken maikkan ti padagsen na tapno saan a maiyangin ken alisto a maperdi.
