LAOAG CITY – Kwinestyunaran ni Konsehal Jason Perera ditoy ciudad ti Laoag ti saan a pannakaipaay ti paltog kadagiti kameng ti Civil Security Unit (CSU).
Inpetteng na a rumbeng a maikkan ti paltog dagiti kameng ti CSU tapno adda ti usaren da no bilang adda dagiti mapan sumrek iti City Hall a dakes ti panggep na.
Kuna na a no adda ti iggem a paltog dagiti kameng ti CSU ket makapagresponde da a dagus no adda ti dakes a mapasamak kas ti napasamak a pammaltog iti Ateneo de Manila University a nakatayan ti tallo nga indibidual a pakairamanan ti dati a mayor iti Basilan.
Mainaig iti daytoy, inlawlawag ni Mr. Clinton Ulep, ti mangidadaulo iti General Services Office (GSO) ditoy ciudad a saan pay a nakarehistro dagiti paltog.
Innayon na a manipod iti 24 a paltog a ginatang ti gobierno lokal ditoy ciudad ket sumagmamano kadagitoy ti naipaima iti PNP idinto a dagiti dadduma ket adda iti opisina da.
Naamoan a 78 amin a kameng ti CSU ngem no adda ti pakaipaimaan dagiti paltog ket dagiti laeng 11 a regular.
