LAOAG CITY – Inlawlawag ni Sang Panlungsod Justine Chua, ti chairman ti committee Market and Slaughter House ditoy ciudad ti rason no apay nga in-withdraw ni Mayor Michael Marcos-Keon ti Certified Urgent Measure mainaig iti night market ditoy ciudad.
Inbaga ni Chua nga iti panagsarita da iti mayor ket naamoan na nga adda ti kalikagom na a mabalbaliwan iti ordinansa mainaig iti pannakaiserra ti Abadilla St. ken Villanueva St. kabayatan ti night market.
Daytoy ket gapu ta iti panagbisita ni Mayor Keon iti lugar ket indanun kenkuana dagiti business owners a no mangrugin ti night market ket saandan a makapagna pay.
Inpakaammo ni Chua nga addan ti proposal ti mayor ngem kayat na pay laeng a maipinal daytoy a banag.
Maipalagip a nagsubli ti night market ditoy ciudad idi Oktubre 16 ita a tawen.
