LAOAG CITY – Kalikagom ni Sang. Bayan Member Marvin Pascua iti ili ti Solsona a maamoan ti resulta ti imbestigasyon ti Philippine National Police (PNP) iti maipagarop a kaadda ti gun for hire iti nasao nga ili.
Segun kenni Pascua, nangipila ti maysa a resolusyon tapno malawlawagan ti nagbalin a privilege speech idi ni dati a Konsehal Macmac del Castillo nga adda ti maipagarop nga hired killer nga iggem ti maysa nga opisyal.
Inpetteng na a seryoso daytoy nga alegasyon isut gapo na a napan nagpa-blotter idi ken kiniddaw na iti PNP a mangiyuswat dagitoy ti imbestigasyon.
Inpalgak na a daytoy a banag ket maysa a public concerns tapno maamoan dagiti tattao ti kinapudno nangruna ket awan pay ti nalawag a sungbat iti daytoy.
Gapo iti daytoy, kiniddaw na iti PNP a maikkan da ti kopya iti resulta ti imbestigasyon da ken daytoy ti pagibasaran da iti posible a panangaramid ti maysa a resolusyon no maideklara wenno saan ni Del Castillo kas persona non grata.
Inbatad na a kas maysa a naelektaran idi nga opisyal ni Del Castillo ken ni pudno a nakaawat ti tawag a pagan-annaden dagitoy dagiti kakadua na ket rumbeng laeng nga inpakaammo na iti PNP para iti imbestigasyon ken saan na nga inpublikar tapno saan nga agamak dagiti kailyan da.
