LAOAG CITY – Naitapwak iti derraas ti maysa a kotse nga inturong ti balikbayan iti Bul-og bridge a sakupen ti Brgy. Buyboy iti ili ti Piddig.
Segun ken ni PLt. Rudy James Jacalne, hepe ti Philippine National Piddig, ti driver ti kotse ket agtawen ti 20, baro, balikbayan manipod iti Hawaii ken tubo iti ili ti Solsona.
Kuna ni Jacalne a basar iti naiyuswat nga imbestigasyon, agpadpadaya ti biktima a nangiturong iti Toyota vios nga ngem nakaturog daytoy rason a naidungpar iti maysa a kayo ken nagderderetso a natennag iti derraas.
Gapo iti daytoy, inbatad ti hepe nga naperdi iti sumagmamano a paset ti lugan ken nakapasar iti sugat iti nagduduma a paset iti bagi ti driver.
Dagus a naitaray daytoy iti Piddig Hospital ken dagus met laeng a nakarwar.
Mainaig iti daytoy, kuna ni Jacalne a naduktalan nga adda iti impluwensiya ti nasanger ti driver kalpasan a naggapo iti paggi-inoman iti ili ti Dingras.
Innayun na a naisyuan met daytoy ti cititation ticket nga agbalor iti 2,500 pesos gapo iti panagmaneho na a nabartek ken dimmalan iti drug test ngem negatibo ti resulta na.
Kabayatanna, innayun ti hepe nga awan metten ti sabali a nalabsing ti biktima gapu ta kumpleto ti papeles iti lugan na ken addaan ti US driver’s license a mabalin na a mausar iti 90 days manipod idi simmangpet ti Pilipinas.
Naamoan nga adda pay laeng tallo nga aldaw sipud simmangpet ti balikbayan ditoy Pilipinas.
