LAOAG CITY – Inbatad ni Bukidnon 2nd Distrcit Representative Jonathan Keith Flores a saan nga makatubeng ti agdama a krisis ti enerhiya tapno maipasardeng iti proseso ti impeachment kontra ken ni Bise Presidente Sara Duterte.
Segun kenni Flores, Vice Chairperson iti House Committee on Justice, nailanad iti konstitusion ti pannakasurot iti naituding a timeline, isut gapo na nga ti legal a pagibasaran tapno maiyaleng-aleng daytoy.
Inpetteng ni Flores nga addan dagiti napalabas a desisyon iti Korte Suprema kontra iti Kamara de representantes gapo iti saan a pannakasurot ti deadine dagiti kakastoy a kaso.
Innayo ni Flores a saan a rumbeng nga iset-aside ti panagdengngeg iti kaso no sadinno a naipalaon iti konstitusyon a masapol a sangwen daytoy.
Sinungbatan pay ni Flores dagiti komento a rumbeng a nakatutok laeng ti Kongreso iti krisis ti enerhiya a resulta ti tension diay Middle East.
Inpaganetget na nga adda ti umanay a bilang dagiti agpanpanday linteg iti Kamara de representantes no sadinno a 300 ti miyembro idinto a 50 laeng a kadakuada ti paset iti Committee on Justice ken agtataripnong iti uneg ti maysa a lawas para iti impeachment.
Nupay kasta, inbatad na a ti panagbalin a paset iti prosecution panel ket saan a boluntaryo no diket maysa nga obligasyon ti maysa nga addaan takem iti komite.
