LAOAG CITY – Kritikal ti sitwasyon ti driver ti motorsiklo idinto nga addan iti nasayaat a kasasaad ti lubbon daytoy gapu iti napasamak a desgrasya iti paset ti Brgy. Billoca iti siudad ti Batac.
Daytoy ti inpakaammo ni PLt. Col. Adrian Gayuchan, ti hepe iti Philippine National Pulis iti siudad ti Batac.
Inbatad ni Gayuchan a basar iti naiyuswat nga imbestigasyon, agpaabagatan ti motorsiklo nga inturong ti maysa nga agpapaay iti Mariano Marcos Memorial Hospital and Medical Center iti siudad ti Batac, agtawen ti 28 kadua na ti lubbon na a tubo iti Claveria, Cagayan ken agtawen ti 32.
Inbatad na a bayat a dumaldalyasat dagitoy iti nasao a kalsada ket napan iti sabali a linya tapno ag-overtake ngem dita nga adda ti sumungad a tricyle nga inturong ti engineering student a residente iti ili ti San Nicolas.
Inpakaammo ni Gayuchan a gapu iti daytoy, nadalapos ti motorsiklo ti tricyle agingga a nagderderetso a naidungpar iti pavement iti igid ti kalsada.
Mainaig iti daytoy, kuna ti hepe a nagsagaba ti sugat iti nagduduma a paset ti bagi dagiti nagkallubon iti motorsiklo ken dagus a naitaray dagitoy iti ospital.
Nu pay kasta, inbatad na a kritiikal ti kundisyon ti driver ti motorsiklo.
Rumrumuar a napaspas ti taray ti motorsiklo idi napasamak ti insidente ken maipagarup a napuyatan ti driver.
