LAOAG CITY – Dead on arrival ti maysa a lalaki kalpasan ti napasamak a desgrasya iti ili ti Pasuquin.
Nabigbig ti biktima a ni James Mamuad, agtawen ti 27, awanan ti asawa, aglaklako ti ikan ken residente iti Sitio Nagabungan, Barangay 5, Davila iti nasao met laeng nga ili.
Segun kenni Police Patrolman Robin Andres, imbestigador iti nasao a pasamak, bayat nga agpaamyanan a direksyon ti biktima ket nadungpar na ti kilometer post.
Gapo iti daytoy, nagsagaba ti nakana a sugat iti nagduduma a paset ti bagi ti biktima kangrunaan ti ulo na.
Dagus a naitaray ti biktima iti Governor Roque Ablan Senior Memorial Hospital ngem naideklara a dead on arrival babaen iti attending physician a ni Dr. Ricarte Caday.
Inbatad ni Andres a bayat nga iturturong ni Mamuad ti motorsiklo ket adda iti impluwensya ti nasanger, napataray ken naigid unay rason a naidungpar iti kilometer post a nangitunda ti desgrasya.
