Lalaki idiay Amerika, nangabak iti pasalip kalpasan a nakaimula ti higante a karabasa nga addaan ti kadagsen a nasurok maysa a ribu a kilo

LAOAG CITY – Maysa a lalaki manipud idiay Minnesota, USA ti nangabak iti Safeway World Championship Pumpkin Weigh-Off gapu iti higante a 1,120 kilo a karabasa a pinanagananna ti “Rudy.”

Ni Travis Gienger ket nagbiahe ken intugotna ti nakadakdakkel a karabasa para iti pasalip iti Half Moon Bay, California no sadinno a naikabil iti nakadakdakkel met a pagkiloan ken napadayawan nga isu ti kadagsenan kadagupan iti amin.

Daytoy ti maikapat a panagballigi ni Gienger iti kangatoan a puesto iti Safeway World Championship Pumpkin Weigh-Off.

Idi 2023, ti 1,246 kilo a karabasa ni Gienger a pinanagananna ti “Michael Jordan” ti nangabak iti first prize ken pinadayawan ti Guinness World Record para iti titulo nga “Heaviest Pumpkin.”