LAOAG CITY – Maysa nga ama manipud idiay London ti nagballigi iti maysa a saan a gagangay a karit kalpasan a nabisitana ti 42 a museo iti uneg ti 24 nga oras ken nangipaay kenkuana ti baro a Guinness World Record para iti kaadduan a museo a napananna iti maysa nga aldaw.
Ni Ben Melham, agtawen ti 42 ket inspirasionna dagiti annakna nga isuda Matilde ken Henrik tapno padasen daytoy a rekord.
Segun kenkuana, nangrugi laeng ti ideya kas maysa a naragsak a panagsasarita kabayatan a basbasaenda ti Guinness World Records book.
Kaduana dagiti annakna iti sumagmamano kadagiti binisitana a museo.
Napilina nga aramiden daytoy idiay London gapu iti kinaadu ti museo iti siudad nga adda ti sumurok 200 manipud kadagiti dadakkel nga institusion kas ti British Museum ken Victoria & Albert Museum agingga kadagiti kababassitan kas ti Bank of England Museum ken Bow Street Police Museum.
Kabayatanna, naartapanna ni Melham ti dati nga akin-rekord iti 33 museo nga inkeddeng da Sujoy Kumar Mitra ken Swaroop Dawrani idiay Delhi, India idi 2024.
