LAOAG CITY – Inbatad ti Commission on Elections (Comelec) a mabalin paylaeng nga agpaidasig iti aniaman a public office ni Cavite 4th District Rep. Francisco “Kiko” Barzaga uray na-expel iti kamara de representantes.
Segun iti Commission on Elections, ti pannaka-expel ket kaipapanan ti pannakapukaw iti pwesto iti kongreso ngem saan nga otomatiko a mangipawil nga agkadidato manen, agingga a saan a madiskwalipikado wenno adda ti final ruling a mangipawil iti panagpaidasig iti aniaman a public office.
Ti rakurak ti ahensya ket kalpasan ti nagbalin a desisyon ti kamara de representantes nga ikkaten iti pwesto ni Barzaga gapu iti maipagarop a panaglabsing na iti House rules ken ethical standards.
Innayon ti ahensya a no ti bakante a pwesto iti distrito na ket kwalipikado para iti special elections, mabalin da nga ituloy kas maiyataday iti maipatpatungpal a linteg.
Agtultuloy paylaeng a mamonmonitor ti sitwasyon kabayatan a namnamaen a ti sumaruno nga addang ket ti possible a pannakaipatungpal ti special elections iti nasao a distrito.
