LAOAG CITY – Inpeksa ni Mr. Clarence Andres ti sakit ti nakemna kalpasan a maipagarup a dinangran daytoy dagiti body guard ni Mayor Joseph De Lara iti ili ti Solsona.
Segun ken ni Andres, nagturong daytoy iti munisipio tapno mapan mangala ti Taxpayer Identification Number ngem nakitana ti grupo ti Mayor ket ditoy metten a maipagarup a kellaat a tinengngel ken dinangran isuna dagiti body guard-na daytoy.
Inlawlawagna a patienna a gapu iti panangdadaelna ti poster ni De Lara ken panag-post-na daytoy iti online maikontra iti administrasion ti nangitunda iti napasamak kenkuana.
Mainaig iti daytoy, inbatad ni Mayor De Lara a gandaten ni Andres a darupen isuna rason a tinengngel dagiti body guard-na.
Kabayatanna, naammoan a nagsurat ni Andres ti Open Letter to the Governor maipanggep iti nasao nga insidente.
