LAOAG CITY – Agtultuloy a maag-agasan iti Mariano Marcos Memorial Hospital and Medical Center idiay ciudad ti Batac ti biktima ti pammagkong iti Paoay, Ilocos Norte.
Nabigbig ti biktima a ni Russel Sacupaso, agtawen ti 32, awanan ti asawa ken residente ti Barangay San Pedro ti nasao nga ili.
Segun ti PNP, bayat ti panagpatrolya da ti poblacion road a bisinidad iti Barangay Dolores iti ili a Paoay ket nagpatulong kadakuada ti nasao a biktima kalpasan a binagkong ti suspek a nabigbig laeng ti nagan na nga “Habit” a taga Vintar met laeng.
Nagsagaba ti sugat ti biktima iti akin-kannawan a paset ti buksit na.
Inpakaammo ti biktima a nagtalapwagaw a dagus ti suspek kalpasan a nabagkong na daytoy.
Iti agdama, agtultuloy ti panangan-anop dagiti otoridad ti suspek tapno maamoan no ania ti motibo ti napasamak a pammagkong.
