LAOAG CITY – Nasugatan iti buksit ti maysa a lalaki kalpasan a nabagkong iti Barangay 27, Duripes, Bacarra, Ilocos Norte usar ti paet.
Nabigbig ti biktima a ni Manuel Madariaga y Afaga, 39, addaan ti live-in partner idinto a ti suspek ket ni Ferdinand Atud y Tumacas, addaan ti umno a tawen, addaan ti live-in partner ken agpada dagitoy a residente iti nadakamat a barangay.
Iti inisyal nga imbestigasyon dagiti otoridad, kabayatan ti panaggiinom ti biktima iti mismo a balay da kadwa na ti kabsat na a ni Mars Madariaga ken agnagan iti Bernard Rias ket napan ti suspek ket idin ta naaddaan dagitoy ti nabara a diskusyon.
Kabayatan ti diskursyon, nangala ti suspek ti kayo ket inpang-or na iti ulo ti biktima kalpasan na ket binagkong na pay daytoy iti buksit na.
Naitaray ti biktima iti Bacarra Medical Center para iti pannakaagas na ngem naiyakar daytoy iti Mariano Marcos Memorial Hospital and Medical Center (MMMH-MC) iti ciudad ti Batac City.
Naamoan a naglibas a dagus ti suspek kalpasan ti pammagkong ngem natiliw daytoy kalpasan ti naisayangkat nga hot pursuit operation iti kamamaisan a paset ti barangay da a naglemmengan na.
Iti agdama, nagtalinaed ti suspek iti kustodyar ti PNP-Bacarra ken maisagsaganan ti reklamo a maipila kontra kenkuana.
