LAOAG CITY – Naibaluden ti lalaki a nagsirip ken nangivideo iti babai nga agdigdigos iti banyo kalpasan a saan a nakapiyansa iti kaso na.
Daytoy ket ni Lucky Laurence Castro, agtawen ti 29, addaan ti live-in partner ken residente ti Bgry 11 iti ili a San Nicolas.
Inlawlawag ni SPO1 Rusela Corpuz iti PNP San Nicolas, rimuar ti mister ti biktima gapu ta adda ti gatangen na iti tiangi ngem dita a nakita na ti suspek a nakatakder iti rabaw ti lababo bayat a nakaiggem ti cellphone ken al-alaan na ti video ti agdigdigos nga asawa na.
Gammatan kuma ti mister ti suspek ngem nagtartaray daytoy agingga a nakadanun da iti Brgy Raraburan iti siudad ti Laoag.
Kuna ni Corpuz a nagpatulong ti mister kadagiti tanod ti nasao a barangay ken dita a nakemmeg da ken nagpaayab da ti pulis.
Nabuya manipud iti cellphone ti suspek ti video ti biktima a nagpaot ti 18 a Segundo.
Ni Castro ket sumangsango ti kaso a panaglabsing ti RA 9995 wenno Anti-Photo and Video Voyeurism act of 2009 ken nairekomendar ti 40,000 a piyansa na.
