LAOAG CITY – Nasugatan ti maysa a lalaki kalpasan a binagkong ti karruba na iti Barangay Albano iti ili ti Dingras.
Segun kenni Police Major Ryan Retotar, chief of police ti PNP-Dingras, ti suspek ken biktima ket agtawen ti 22 ken agpada a construction worker.
Inbatad ni Retotar nga iti panagimbestigar da ket naggapo ti paggi-inuman ti suspek ken idi agawid ket nalabsan na ti grupo ti biktima nga agin-inom.
Gapo iti daytoy, napan ti suspek iti ayan ti biktima ken nakialamano kenkuana idi kellaat a binagkong na daytoy usar ti kutsilyo.
Dagus met a naitaray ti biktima iti Dingras District Hospital ngem naiyakar iti Gov. Roque Ablan Senior Memorial Hospital ditoy ciudad ti Laoag.
Mainaig iti daytoy, iti panagimbestigar ti PNP, kuna ni Retotar nga iti napalabas a tallo a lawas ket adda ti riri a napasamak iti nagbaetan ti suspek ken biktima.
Inlawlawag na nga naggapo met laeng iti paggi-inuman ti suspek ken bayat nga agtartarimaan ti biktima ken ti kabsat na ti motorsiklo ket kinulit na ken pinagsaw-an na ti dakes dagiti aglabsat isut gapo na a nadangran da daytoy.
Nupay kasta, naamoan a nagsasarita da iti biang ti barangay kalpasan daytoy.
Kabayatanna, ti suspek ket addan iti kustudiyar ti PNP-Dingras ken maisagsaganan ti kaso a frustrated murder kontra iti daytoy.
