LAOAG CITY – Maipaayan ti tulong ti sumagmamano a mangngalap a maapektaran iti pannakaiwayat ti Balikatan Excercises ditoy siudad ti Laoag partikular iti Barangay Metro Lapaz ken Barangay Talingaan.
Segun ken ni Mayor James Bryan Alcid, nangipaay ti Department of National Defense ti 500 ribu a pisos para kadagiti maseknan a mangngalap.
Inbatadna a kitkitaenda pay no ania met ti maited ti lokal a gobierno para kadakuada.
Naammoan a mangrugi ita nga aldaw iti pannakaiwayat ti Balikatan Excercises kadagiti nadakamat a barangay.
Paset ti aktibidad iti panagtinnulong dagiti nagduduma a pagilian no kasapulan ken kasta metten ti kapabilidad ti tunggal maysa.
Kabayatanna, ditoy siudad ti Laoag ti maysa kadagiti lugar a masansan a pakaiwaywayatan ti Balikatan Excercises.
