LAOAG CITY – Pimmusay ti maysa a lakay kalpasan a sinangdo ti taraken na a nuang idiay Marcos Ilocos Norte.
Nabigbig ti biktima a ni Bernardo Rumbaoa y Daguro, agtawen ti 72 naasawaan ken residente iti Brgy. Escoda ti nasao nga ili.
Basar iti imbestigasyon ti PNP-Marcos, manarimaan nga ipakpakan ti biktima ti taraken na iti kataltalunan idi malem kalman idi bigla a nagwala.
Inkarigatan ti biktima a pakalmaan daytoy ngem bigla a sinangdo na daytoy a nakatamaan ti barokong na.
Naitaray nga insigida ti biktima iti Doña Josefa Edralin Marcos District Hospital (DJEMDH) baben iti asawa ken anak na ngem naideklara a natayen babaen iti nangatendar a doctor.
