LAOAG CITY – Inrakurak ti City Engineering Office nga addan dagiti manarimaan nga iplasplastarda a programa a pannaka-renovate ti Laoag City Public Market and Commercial Complex.
Segun ken ni Engr. Marishel Batuac, mangidadaulo ti nasao nga opisina, adda ti inwayatda nga evaluation iti merkado publiko ket naobserbaranda nga adda ti rikki iti east slide A a paset ti tiendaan a pangipagnaan dagiti vendor kadagiti lakoda nga epekto kadagiti naglabas a ginggined.
Nupay kasta, inbatadna nga iti agdama ket natalged met pay laeng daytoy a pagnaan dagiti tattao ngem kasapulan a ma-renovate iti kabiitan a panawen.
Inlawlawagna nga iti paset ti wet section wenno paglakoan ti karne ken ikan ket naobserbaran ti City Engineering Office nga adda ti rikki ti dadduma a tiles kadagiti lababo a saan a napintas a kitkitaen.
Mainaig iti daytoy, inpasingked ni Batuac a pagbalinendanton nga stainless amin tapno nataltalged ken saan a nalaka a madadael.
Inpakaammona pay nga iti basement ket addanto ti aramidenda a retrofitting wenno pannakaisimpa ti flooring-na gapu ta naobserbaranda a no aglippias ti kanal ket sumngaw met ti bangsitna.
Kunana nga amin dagitoy ket manarimaanen ti pannakaiprograma ken panangadalna no mano amin ti kasapulan ti City Government a pundo tapno maipatungpal dagitoy a proyekto.
Inpanamnama ti mangidadaulo ti City Engineering Office nga iti daytoy a tawen ket manamnama a marugianen dagitoy a proyekto a mangpapintas ti Laoag City Public Market and Commercial Complex.
