LAOAG CITY – Inpakaammo ni Mayor James Bryan Alcid ditoy ciudad ti Laoag a saan a kasapulan iti agnayon ti staff iti Laoag City General Hospital gapu ta patien na nga adda ti umdas a bilang dagiti agpapaay iti nasao nga ospital.
Kunana a ti laeng rumbeng a maplastar ket ti schedule da ken dagiti visiting doctor iti Laoag City General Hospital.
Mainaig iti daytoy, maragsakan ni Mayor Alcid gapu ta ado pay dagiti volunteers a tumultulong wenno mangas-asistir kadagiti empleado ti nadakamat nga ospital.
Nupay kasta, kunana nga iti baet ti kaadda dagiti volunteers iti Laoag City General Hospital ket adda iti nakitana iti social media nga agriri no apay a saan da nga agsweldo.
Inlawlawag met ti mayor a no boluntario ket saan nga inkapilitan iti panagtrabaho da no diket isuda ti nangipresentar ti bagida a tumulong.
Kabayatanna, kunana a no addan to iti bakante a posisyon iti Laoag City General Hospital ket maipangpangrunan to dagitoy nga agtrabaho iti nasao nga ospital.
Inpasingked ti mayor ti pannakaipaay ti alisto a serbisio kadagiti pasyente nga agturturong iti Laoag City General Hospital.
