LAOAG CITY – Inlawlawag ni Atty. Alfonso delos Reyes, legal officer ni Mayor Joseph de Lara nga awan ti maris pulitika na ti inpila na a kaso administratibo kontra kenni Barangay Chairwoman Evangeline Rarangol iti Barangay Nagpatpatan iti ili ti Solsona.
Inbatad na nga inpila na ti kaso kalpasan a nangiparuk-at ti memorandum ni Mayor de Lara.
Namonganay daytoy gapu iti maipagarop a panangisawang ni Raranggol a sungbatan na laeng ti nasao a memorandum no adda ti maipila a kaso kontra kenkuana.
Nangiparuk-at ti memorandum ti mayor kalpasan a nagsurat ti Department of Social Welfare and Development (DSWD) iti opisina na no apay a nagrepack ti relief goods ni Barangay Chairwoman Raranggol.
Maipalagip a dagiti kadagiti relief goods a maipagarop a biningay-bingay ni Raranggol ket aggapo iti Department of Social Welfare and Development – Region I a maibunong kadagiti residente a biktima ti dimmuprak a bagyo ditoy probinsia iti kallabes.
