LAOAG CITY – Positibo ti naiyuswat a search warrant operation iti Brgy. 1 San Roque iti ili ti Vintar.
Ti operasyon ket naiyuswat a mismo iti pagtaengan ti subject a ni Derrick Agcaoli y Flores alyas Dora, agtawen ti 33, residente iti nasao a ken miembro ti LGBTQ+ community.
Nailanad iti search warrant nga inparuk-at ti RTC Branch 14 ditoy siudad ti Laoag a masukimat iti pagtaengan ti suspek ti maipagarup nga iligal a droga.
Kabayatan ti panagsukimat dagiti otoridad ket nabirokan iti dirty kitchen ti tallo a sachet ti maatap a shabu a naipalaon iti bassit a plastic bottle ken agdasen ti agarup maysa a gramo ken mapatta-patta nga agbalor ti 6,800 a pisos.
Mainaig iti daytoy, kuna ni PCapt. Manuel Ordonio, hepe ti Philippine National Police Vintar a ti suspek a ni Agcaoili ket maysa nga High Value Targer Individual iti Philippine Drug Enforcement Agency List.
Kuna na nga addan ti immuna a pannakatiliw ti suspek idi 2020 gapu met laeng iti nasao a kaso.
Segun ken ni Ordonio, malpas koma ita a tawen ti probation ti suspek ngem manamnama a saan a matuloy gapu ta mapatawan manen iti sabali a kaso.
Kabayatanna, naiget a naglikudan ti suspek a kukua na dagiti nakumpiskar nga iligal a droga ken inpetteng na a nagbalbaliwen sipud idi naudi a natiliw.
Patien ti suspek a naimula iti pagtaengan na dagiti nakumpiskar nga iligal a droga.
