LAOAG CITY – Naipasa ti resolusion nga inyendorsar ni Mr. John Carlo Sacubo, Local Government Operations Officer ti Department of the Interior and Local Government-Ilocos Norte kabayatan ti 3rd Quarter Joint Provincial Peace and Order Council ken Provincial Anti Drug Abuse Council meeting.
Naisaguday iti nadakamat a gakat ti pananggutigot kadagiti amin a Local Government Units ditoy probinsia a mangparegta ken mangpapigsa iti programa, proyekto ken aktibidad dagitoy kontra iti maipawil a droga.
Immun-una ngem iti daytoy, inlawlawagna a napanunutan ti Department of the Interior and Local Government nga inlungalong ti pannakaipasa ti nasao a gakat kalpasan a naammoanna nga adda pay laeng dagiti Local Government Units ditoy probinsia a saan pay a “drug cleared.”
Mainaig iti daytoy, inpakaammona nga adda dagiti isagsagana ti Department of the Interior and Local Government nga aktibidad tapno matulungan dagiti lokal a gobierno a manglaban iti maipawil a droga.
Inlawlawagna a maibilang ditoy ti plano a pannakaisayangkat ti “Usapang Bida” iti masungad nga Oktubre 29.
Malaksid iti daytoy, inpakaammona a manamnama a maisayangkat ti SICAP BADAC wenno Strengthening Institutional Capacities of Barangay Anti Drug Abuse Councils inton Oktubre 9 ken 10 para iti ili ti Bangui ken San Nicolas a maiyuswat idiay San Fernando City, La Union.
Innayonna a manarimaan ti “finalization” ti pundo para iti “2025 POPS Plan” wenno ti para iti Peace and Order and Public Safety Plan a kiniddaw ni Bokal Gian Carlo Crisostomo, Chairman ti Peace and Order Council ti Sangguniang Panlalawigan ken ti Department of the Interior and Local Government Ilocos Norte Provincial Office.
