LAOAG CITY – Mabalinen a makaala ti libre a pammigat ken pangaldaw dagiti driver ti Public Utility Vehicles (PUVs) iti Walang Gutom Kitchen ti Department of Social Welfare and Development (DSWD) idiay Pasay City.
Basar iti Department of Social Welfare and Development, inrubuat ti programa tapno matulungan dagiti driver nga apektado ti agtultuloy a panagngato ti presio ti langis gapu iti gubat iti Middle East.
Maipapaay ti libre a pammigat iti alas-6:00 ti bigat ken alas-11:00 ti bigat para iti pangaldaw, manipud Lunes agingga Sabado.
Karaman kadagiti isagsagana a taraon para iti pammigat ti sinangag, prito a dilis ken scrambled egg nga addaan ti patatas idinto a ti pangaldaw ket addaan ti inapoy, prito a manok ken ginisa a kalabasa nga addaan ti utong.
Inbatad ni Department of Social Welfare and Development Assistant Secretary Irene Dumlao, gagem ti programa a masigurado nga adda ti umdas ken nasustansia a taraon dagiti driver iti baet ti ngumatngato a gastosen.
Kunana a paset daytoy ti whole-of-government approach tapno makatulong kadagiti apektado a sektor, maiyallubog iti pammilin ni Presidente Ferdinand Marcos Jr.
Nakalukat met ti Walang Gutom Kitchen a saan laeng para kadagiti driver no diket para iti asinoman nga agkasapulan ti taraon.
Basar iti datos ti Department of Social Welfare and Development, umaboten iti sumurok 200,000 a taraon ti naipaay idi 2025 iti sumurok 142,000 a benepisiario pakairamanan dagiti baro ken agsubsubli a kliente ti ahensia.
