LAOAG CITY – Nangisayangkat ti lokal a gobierno iti ili ti Sarrat ti maysa a symposium maipanggep iti teenage pregnancy.
Segun ken ni Mayor Ralph Conrad Medrano, ti nasao nga aktibidad ket napauloan ti Teen Talk: Right Choices for Meaningful Future nga inatendaran dagiti Sangguniang Kabataan officials ken members iti nagdududma a barangay iti nasao nga ili.
Inbatadna a gagem ti nasao nga aktibidad a malappedan iti panagadu ti kaso ti teenage pregnancy.
Inlawlawagna a ditoy a naipaganetget kadagiti agtutubo ti importansia iti panangpartuat ti umiso a desision ken pannakaawat ti saan a napintas nga epekto iti nasapa a relasion.
Kunana a ditoy pay a naisuro ti kinapateg ti edukasion iti napintas a masakbayan.
Mainaig iti daytoy, kinarit ti Mayor dagiti Sangguniang Kabataan officials iti ili ti Sarrat nga agbalin a sarming ti kaaduan tapno maitandudo ti positive values, self discipline ken pannakipaset kadagiti aktibidad ti komunidad.
Innayonna a nausar pay daytoy nga aktibidad kas wagas iti diskusion ken magutigot dagiti agtutubo nga agdesision ti husto.
